Брати Молнары з Голубиного

Михаил Молнар, педагог, писатель, фолклорист , родив ся 4.02.1912 р. у селі Голубиноє (Подкарпатя). Закончив Мукачовську Руську Гімназію и учителську семінарію. Проробив 30 рокув директором школы у Голубиному. Вун быв прекрасным організатором. У рудному селі вун організовав камерный хор, хор « Голубинська борона». По ёго сценарію быв знятый філм «Свальба на Свалявщині». Писав начеркы по етнографії Свалявщины, записовав обряды, лексику русинського языка, фолклор. Часть ёго етнографічных робот была выдана ёго братом Василієм у зборнику «Вичурки у вуйны Полані». У період кризиса комуністичної системы восстановив діятелность Общества им. А. Духновича, став ёго первым предсідателём.

Молнар Василій, педагог, писатель, родив ся 12.02.1922 р. у селі Голубиноє (Подкарпатя). Закончив Мукачовську Руську Гімназію (1941), Ужгородську Духовну Академію (1944), філологічный факултет Ужгородського Універзитета (отділеня руського языка и літературы, 1954). Преподавав у середных школах языкы и літературу (руськый, украйинськый, англійськый, німецькый, латинськый). Літературноє творчество зачав ищи у гімназичні рокы, оповідкы и начеркы печатав у алманахах руськым и русинськым языками. Велику часть свого літературного архіва до 1945 р. знищив у період гоненія НКВД проти русинської інтелігенції (1946-1953).

У рокы хрущовської «оттепелі» вернув ся ид літературному творчеству. По русинськы зачав назад писати у кунци 1980 рр. Свої творы публіковав на боках русинськых новинок и журналув у теперішнёму Закарпаті, Словакії, Полші, Мадярщины и США. Выдав зборник.ы «Брызкы з Лужанкы», «Вичурки у вуйны Полані», «Поклик отчого края», «Што ня болить». У защиту русинського слова сочинив памфлеты «Алергія на материнськоє слово» и др. Принимав участіє у составленю граматикы «Материнськый язык. Писемниця русинського языка».